Nordlánda filkkadigge mierredij jagen 2022 juhte Knut Hamsun joarkkaskåvllå galgaj liehket oassen álggoprosjevtas luohkkoskåvllån julevsáme giellaj ja kultuvrraj. Luohkkoskåvllå álgaduváj jagen 2023, ja oattjoj dahkamussan tjårggit fágalasj kvalitiehtav sámegielåhpadimes. Ietjá dahkamusá lidjin åvddånahttet buorre åhpadimgárvvidusájt, láhtjet dilev fáhkaværmádahkaj sámegielåhpadiddjijda, ja duodden åvddånahttet diehtomateriálajt skåvlåjda.
–Julevsábme l ájnas
Dálla oajvvat filkkaráde avta filkkadiggeássjen prosjevtav stuovvásin dahkat.
–Luohkkoskåvllå galggá oassálasstet nannitjit ja åvdedittjat máhtudagáv julevsáme giela ja sáme kultuvra birra boahtteájggáj, javllá filkkaráde gænna l åvdåsvásstádus åhpadimes, Joakim Sennesvik (H).
Sån duoddis julevsámegiella l sierraláhkáj ájnas Nordlánda filkkasuohkanij, gå háldadimguovllo julevsámegiellaj la Nordlándan, Hábmerin.
–Danen la luondulasj Nordlánda filkkasuohkanij åvdåsvásstádusáv válldet bisodittjat ja nannitjit julevsámegielav.
Stuorra skábmo
Jagen 2023 bådij Duohtavuoda- ja såbadimkommisjåvnå rappårttå, mij subtsastij dárojduhttempolitihka birra, ja gåktu oajválattja li adnám åhpadimvuogádagáv ræjddon gájddadittjat ja dagátjit sáme gielajt, kultuvrav, ja dan láhkáj aj identitiehtav, vuojnnemahttásin.
–Dát la stuorra skábmo mijá aktisasj histåvrån. Histåvrålattjat la dagáduvvam stuorra vierrevuohta sáme álmmuga vuosstij. Dálla vierttip aktan gæhttjalit njuolggit vahágijt ma li dáhpáduvvam. Nanostuhttem julevsámegielas Knut Hamsun joarkkaskåvlå baktu la akta vuohke låpptit vájmogielav Sámen. Ájnas la ådåsis tsieggit luohtádusáv sáme birrusa ja ieneplågosebrudagá gaskan, såbadime diehti, javllá filkkarádejådediddje Svein Eggesvik (Sp).
Gåvvidit moattebelakvuodav
–Nammamålssum Knut Hamsun joarkkaskåvlån la luondulasj oasse dát prosjevtas, duodden tsieggit profijlav luohkkoskåvllåj, logojn, næhttabielijn sáme tevstajn ja dájdda/hærvva mij gåvvit moattebelakvuodav. Rubbmelasj ja digitálla tjalmostahttem ja ådåstuhtedum ja ådåájggásasj materiála máhtti oassálasstet dási, låhpat filkkaráde åhpadibmáj Joakim Sennesvik.